ရာသီကြိုပွဲအတွက် အာရုံစိုက်ထားဟု ဂျိုကစ် ပြော
-----------------------
အဘူဒါဘီမှာ ကစားမယ့် ဘော်စတွန်ဆဲလ်တစ်အသင်းနဲ့ NBA ရာသီကြို လက်ရည်စမ်းပွဲအတွက် အာရုံစိုက်ပြီး သေချာပြင်ဆင်ထားတယ်လို့ ဒန်ဗာနက်ဂျက်အသင်း ကြယ်ပွင့် နီကိုလာ ဂျိုကစ်က ပြောကြားခဲ့ပါတယ်။ ၂၀၂၃ NBA ချန်ပီယံ နက်ဂျက်အသင်းနဲ့ ၂၀၂၄ NBA ချန်ပီယံ ဘော်စတွန်ဆဲလ်တစ်အသင်းတို့ ကစားမယ့် ရာသီကြို လက်ရည်စမ်းပွဲကို ပရိသတ်တွေ စိတ်ဝင်စားမှု မြင့်တက်နေခဲ့တာ ဖြစ်ပါတယ်။
ဆားဘီးယား ဘတ်စကက်ဘော သမား ဂျိုကစ်ဟာ NBA ပြိုင်ပွဲရဲ့ တစ်ရာသီအကောင်းဆုံးကစားသမားဆုကို ၃ ကြိမ်ရရှိထားသူဖြစ်ပြီး အခု လက်ရည်စမ်းပွဲမှာလည်း ပရိသတ်တွေရဲ့ စောင့်ကြည့်အားပေးတာကို ခံရမယ့်သူ လည်း ဖြစ်ပါတယ်။ နက်ဂျက် အသင်းကြယ်ပွင့် ဂျိုကစ်က ရာသီကြိုလက်ရည်စမ်းပွဲအတွက် အကောင်းဆုံး ပြင်ဆင်ထားသလို လာမယ့် NBA ရာသီမှာ ချန်ပီယံဆုကို ပြန်လည်ရယူနိုင်ဖို့အတွက် ကြိုးစားသွားမှာဖြစ်တယ်လို့ ပြောကြားထားပါတယ်။
NBA အဖွဲ့ချုပ်နဲ့ အဘူဒါဘီ ယဉ်ကျေးမှုနဲ့ခရီးသွားလာရေးဝန်ကြီးဌာနတို့အကြား သဘောတူညီမှုအရ NBA ရာသီကြို ပွဲစဉ်တွေကို အဘူဒါဘီမှာ လက်ခံကျင်းပခဲ့တာက အခုနှစ်နဲ့ဆိုရင် ၃ နှစ်ဆက်တိုက် ရှိလာခဲ့ပြီလည်း ဖြစ်ပါတယ်။
