အီရန်က အစ္စရေးကို ပဲ့ထိန်းဒုံးကျည်အစင်းရေ ၁၈၀ ဖြင့်ပစ်ခတ်တိုက်ခိုက်
---------------------------
အီရန်က အစ္စရေးကို အောက်တိုဘာ ၁ ရက်ညက ပဲ့ထိန်းဒုံးကျည်အစင်းရေ ၁၈၀ လောက်နဲ့ပစ်ခတ်ခဲ့ပြီး အများစု ကို ကြားဖြတ်ပစ်ချခဲ့တယ်လို့ အစ္စရေးစစ်တပ်က ပြောပါတယ်။ ဒုံးကျည်တချို့ထိမှန်တဲ့နေရာတွေထဲမှာ အစ္စရေး နိုင်ငံအလယ်ပိုင်းက ကျောင်းတစ်ကျောင်းနဲ့ တဲလ်အဗစ်က စားသောက် ဆိုင်တစ်ဆိုင်ပါဝင်ခဲ့ပြီး သိမ်းပိုက်ထားတဲ့ အနောက်ဘက်ကမ်းဒေသမှာတော့ ပါလက်စတိုင်း အမျိုးသားတစ်ယောက်သေဆုံးခဲ့တယ်လို့ အစ္စရေးက ထုတ်ပြန်ခဲ့ပါတယ်။
အစ္စရေးဝန်ကြီးချုပ် ဘင်ဂျမင်နေတန်ညာဟုကတော့ အီရန်ဟာ အမှားကြီးတစ်ခုကို ကျူးလွန်လိုက်ပြီး အဲဒီ အတွက်ပေးဆပ်ရမယ်လို့ တုံ့ပြန်ခဲ့ပါတယ်။ အီရန်တိုက်ခိုက်မှု မအောင်မြင်ဘူးလို့လည်းဆိုခဲ့ပြောပါတယ်။ အစ္စရေးစစ်တပ်က အီရန်နောက်ခံပြု ဟစ်ဇ်ဘိုလာကို တိုက်ခိုက်ဖို့ အကန့်အသတ်နဲ့ ဒေသအလိုက် ပစ်မှတ်ထား တဲ့ မြေပြင်စစ်ဆင်ရေးစတင်ပြီးနောက် အီရန်က အစ္စရေးကို ဒုံးကျည်အများအပြားနဲ့ ပစ်ခတ်ခဲ့တာလည်းဖြစ်ပါတယ်။
တီဟီရန်ကို အစ္စရေးက ထပ်မံတိုက်ခိုက်လာရင် အစ္စရေးရဲ့ အခြေခံအဆောက်အအုံတွေကို ပစ်မှတ်ထားတိုက်ခိုက် သွားမယ်လို့လည်း အီရန်စစ်တပ် စစ်ဦးစီးချုပ် ဗိုလ်ချုပ်ကြီး မိုဟာမက် ဘက်ဟီရီက ခြိမ်းခြောက်ခဲ့ပါတယ်။ အစ္စ ရေးက လက်တုံ့ပြန်ခဲ့မယ်ဆိုရင် စစ်ဆင်ရေးဟာ အဆပေါင်းများစွာ ပိုပြင်းထန်မယ်လို့လည်း နိုင်ငံပိုင်ရုပ်သံကနေ တုံ့ပြန်ခဲ့ပါတယ်။ အပစ်အခတ်ရပ်စဲရေးဆောင်ရွက်ဖို့ ကုလသမဂ္ဂနဲ့ အီးယူတို့က ထပ်မံတောင်းဆိုထားပြီး ကုလသ မဂ္ဂ လုံခြုံရေးကောင်စီ အစည်းအဝေးကို အောက်တိုဘာ ၂ ရက်မှာ ပြုလုပ်သွားဖို့ရှိနေပါတယ်။
