ဖူဆယ်ပြိုင်ပွဲမှ ရရှိသည့်ငွေများကို ရေဘေးထူထောင်ရေး လှူဒါန်းမည်
-----------------------------
ရေဘေးသင့်ဒေသတွေ ပြန်လည်ထူထောင်ရေးအတွက် ရှပ်ရှင်၊ ဂီတနယ်ပယ်က အနုပညာရှင်တွေနဲ့ ရန်ကုန်တိုင်း အမျိုးသမီးလက်ရွေးစင်အသင်းတို့ ပါဝင်ကစားခဲ့တဲ့ ရန်ပုံငွေဖူဆယ်ဘောလုံးပြိုင်ပွဲကို စက်တင်ဘာလ (၂၄)ရက် ကနေ(၂၇)ရက်အထိ ရန်ကုန်မြို့ သုဝဏ္ဏ မိုးလုံလေလုံဖူဆယ်အားကစားရုံမှာ ကျင်းပခဲ့ပါတယ်။

အဲဒီ ရန်ပုံငွေပြိုင်ပွဲက ရရှိတဲ့အလှူငွေတွေကို ပြန်လည်ထူထောင်ရေးအတွက် လိုအပ်တဲ့နေရာတွေမှာ သွားရောက် လှူဒါန်း သွားမှာဖြစ်တယ်လို့ ရန်ပုံငွေ ဖူဆယ်ဘောလုံးပြိုင်ပွဲ စီစဉ်သူ ကိုကျော်စွာက ပြောပါတယ်။ ရန်ပုံငွေပြိုင်ပွဲ မှာ အသင်း(၄)သင်းဖြစ်တဲ့ ရန်ကုန်တိုင်း အမျိုးသမီးလက်ရွေးစင်အသင်း YW FC ၊ Music FC ၊ Movie FC နဲ့ Frie nd FC အသင်းတို့က ပတ်လည်ယှဉ်ပြိုင်ကစားခဲ့ကြပြီး စက်တင်ဘာလ(၂၇)ရက်မှာတော့ နောက်ဆုံးပွဲစဉ်အဖြစ် ယှဉ်ပြိုင်ခဲ့ကြတာ ဖြစ်ပါတယ်။

ပြိုင်ပွဲအပြီးမှာ ဆုပေးပွဲ အခမ်းအနား ကျင်းပခဲ့ပြီး ပထမဆုကို Music FC ၊ ဒုတိယဆုကို Friend FC အသင်း၊ တတိယဆုကို Movie FC အသင်းနဲ့ စတုတ္ထဆုကို ရန်ကုန်တိုင်း အမျိုးသမီးလက်ရွေး စင်အသင်း YW FC တို့က ရရှိခဲ့ကြပါတယ်။ ရန်ပုံငွေ ဖူဆယ်ဘောလုံးပြိုင်ပွဲ မှာတော့ ပွဲလာရောက်ကြည့်ရှုတဲ့ ပရိသတ်တွေနဲ့ ဆက်သွယ် လှူဒါန်းမှု စုစုပေါင်း ကျပ်သိန်း ၁၀၀ ကျော် ရရှိခဲ့ပြီး ရေဘေးပြန်လည်ထူထောင်ရေး လုပ်ငန်းတွေမှာ လှူဒါန်း သွားမယ်လို့ ပွဲစီစဉ် ကျင်းပတဲ့သူတွေဆီက သိရပါတယ်။