ဟစ်ဇ်ဘိုလာ ထိပ်တန်းအရာရှိတစ်ဦး ထပ်မံသေဆုံး
----------------------
နှစ်ဖက်အပြန်အလှန် တိုက်ခိုက်မှုတွေ ဆက်လက်ဖြစ်ပွားနေချိန်မှာ ဟစ်ဇ်ဘိုလာ အကြီးတန်းပုဂ္ဂိုလ် နာဘီလ် ခါအုတ် သေဆုံးခဲ့တယ်လို့ အစ္စရေးစစ်တပ်က စက်တင်ဘာ ၂၉ ရက်မှာ ပြောပါတယ်။ ဟစ်ဇ်ဘိုလာက ခါအုတ်ရဲ့ ကံကြမ္မာအပေါ် မှတ်ချက်မပေးသေးပေမယ့် ထောက်ခံသူတွေဟာ စနေနေ့ကတည်းက သူ့အတွက် ဝမ်းနည်း ကြောင်း သဝဏ်လွှာတွေ ဖော်ပြခဲ့ကြပါတယ်။
ဟစ်ဇ်ဘိုလာ ခေါင်းဆောင် ဟာဆန် နာစရာလာဟာ စက်တင်ဘာ ၂၇ ရက်က ဘေရွတ်မြို့တောင်ပိုင်း ဆင်ခြေဖုံး ရှိ အဖွဲ့ရဲ့ ဌာနချုပ်မှာ ကြီးမားတဲ့ အစ္စရေးလေကြောင်း တိုက်ခိုက် မှုကြောင့် သေဆုံးသွားခဲ့ပါတယ်။ အဲဒီနောက် ဟစ်ဇ်ဘိုလာက အစ္စရေးနိုင်ငံအတွင်းကို ဒုံးကျည်အသစ်တွေနဲ့ ပစ်ခတ်ခဲ့ပြီး အီရန်ကလည်း လက်စားချေမယ်လို့ ပြောခဲ့ပါတယ်။
အစ္စရေးရဲ့ ရည်မှန်းချက်ဟာ ဟစ်ဇ်ဘိုလာ ဒုံးကျည်ပစ်ခတ်မှုကနေ ကင်းဝေးစေဖို့နဲ့ မြောက်ပိုင်းဒေသတွေဆီ ရွှေ့ ပြောင်းနေထိုင်သူ ထောင်ပေါင်းများစွာ ပြန်လာခွင့်ပြုဖို့ ဖြစ်ပေမယ့် တိုက်ခိုက်မှုတွေက လက်ဘနွန် အရပ်သား တွေအပေါ် ဆိုးရွားစွာ ထိခိုက်စေခဲ့ပါတယ်။
လက်ဘနွန်ကျန်းမာရေးဝန်ကြီးဌာနက နှစ်ပတ်အတွင်း လက်ဘနွန်နိုင်ငံသား ၁၀၀၀ ကျော် သေဆုံးပြီး ၆၀၀၀ ဒဏ်ရာရခဲ့တယ်လို့ ပြောပေမယ့် အရပ်သား ဘယ်လောက် ပါဝင်တယ်ဆိုတာ မထုတ်ပြန်ခဲ့ပါဘူး။ လူဦးရေရဲ့ ငါးပုံတစ်ပုံဖြစ်တဲ့ လူတစ်သန်းလောက် အိုးအိမ်စွန့်ခွာထွက်ပြေးခဲ့ရတယ်လို့ လက်ဘနွန်အစိုးရက ပြောပါတယ်။
