မုံရွာမြို့က ရတနာဆိုင် နေ့ခင်းကြောင်တောင် ဓားပြတိုက်ခံရ
-------------------------------
စစ်ကိုင်းတိုင်းဒေသကြီး၊ မုံရွာမြို့၊ မြဝတီရပ်ကွက်၊ မေတ္တာလမ်းသွယ် (၁) ရှိ နဝရတ် စိန်၊ ပလက်တီနမ် ရတနာဆိုင် နေအိမ် မှာ စက်တင်ဘာ ၂၆ ရက်၊ မွန်းတည့် ၁၂ နာရီဝန်းကျင်လောက် လူငါးယောက်က ဓားပြဝင်တိုက်ခဲ့ပြီး စိန်ရွှေရတနာ ပစ္စည်းအကုန်လုံး နဲ့ ဖုန်း ၅ လုံး၊ လက်ပ်တော့တစ်လုံးကို ယူဆောင်သွားတယ်လို့ အခင်းဖြစ် ရတနာဆိုင်က တာဝန်ရှိသူတစ်ယောက်က One News ကို ပြောပါတယ်။
အခင်းဖြစ် ရတနာဆိုင်ကို အမျိုးသား ၃ ယောက် နဲ့ အမျိုးသမီး ၂ ယောက်တို့က ဆိုင်ကယ် ၂ စီးနဲ့ ဈေးဝယ်ဟန်ဆောင် ဝင်ရောက်လာကာ ဆိုင်ရှင်ကို သေနတ်ပြခြိမ်းခြောက်ပြီး ဆိုင်ရှိ ရတနာပစ္စည်းတွေ အားလုံးကို ယူဆောင်ပြီးတော့ ဆိုင်ကယ်တွေ နဲ့ ပြန်လည် ထွက်ပြေးသွားတာလို့ ဆိုပါတယ်။
ဓားပြတိုက်တဲ့ ဖြစ်စဉ်နဲ့ ပတ်သက်လို့ သက်ဆိုင်ရာ မုံရွာမြို့မ ရဲစခန်းမှာ အမှုဖွင့်နိုင်ရေး ဆောင်ရွက်နေပြီး ဆုံးရှုံးမှုကတော့ စိန်၊ ပလက်တီနမ်တွေ အပေါင်ထည်ရတနာတွေ အပါအဝင် စုစုပေါင်း ခန့်မှန်း ကျပ်သိန်း ၂ သောင်းနီးပါး လောက် ပါသွားတယ်လို့ နဝရတ် စိန်၊ ပလက်တီနမ် ရတနာဆိုင်က တာဝန်ရှိသူတစ်ယောက်က ပြောပါတယ်။
အခင်းဖြစ်ချိန်ကတော့ နေ့ခင်းကြောင်တောင် အချိန်ဖြစ်တာကြောင့် ကျူးလွန်သူတွေ ထွက်ပြေးသွားချိန်မှာ ပတ်ဝန်းကျင်ကို အကူအညီတောင်းခဲ့ပေမယ့် ဖမ်းမိခဲ့တာ မရှိဘူးလို့လည်း ဆိုပါတယ်။
လက်ရှိမှာတော့ ဓားပြတိုက်ခံရတဲ့ နဝရတ် ရတနာဆိုင်ကလည်း ကျူးလွန်သူတွေကို ဖမ်းမိဖို့ စီစီတီဗီရုပ်သံဖိုင်၊ ဓာတ်ပုံတွေနဲ့ အတူ လူမှုကွန်ရက်ကတစ်ဆင့် အကူအညီ တောင်းခံထားပါတယ်။
