လိင်တူလက်ထပ်ခွင့်ဥပဒေ ထိုင်းဘုရင်အတည်ပြု
-------------------------
ထိုင်းနိုင်ငံမှာ လိင်တူချင်းလက်ထပ်ခြင်းဥပဒေ အတည်ပြုပြဋ္ဌာန်းတဲ့ အထိမ်းအမှတ်အဖြစ် စက်တင်ဘာ ၂၅ ရက် က အဲဒီဥပဒေကို ထောက်ခံသူတွေဟာ ဘန်ကောက်မြို့လယ်မှာ စုဝေးခဲ့ကြပါတယ်။ အခမ်းအနားမှာ စိုလွင် တောက်ပတဲ့ သက်တန့်ရောင် ကင်းဗတ်စကို ပြသထားပြီး ဖျော်ဖြေသူတွေနဲ့ တက်ရောက်လာသူတွေက အဖြူရောင် ကင်းဗတ်ပေါ်မှာ သူတို့ရဲ့ဆန္ဒကို လက်မှတ်ရေးထိုး ဖော်ပြခဲ့ကြပါတယ်။
ထိုင်းဘုရင်ဟာ အခုနှစ် အစောပိုင်းမှာ လွှတ်တော်က အတည်ပြုခဲ့တဲ့ လက်ထပ်ထိမ်းမြားခြင်းဆိုင်ရာ တန်းတူ ညီမျှရေး ဥပဒေကြမ်းကို ထောက်ခံလိုက်တာပါ။ ဒါကြောင့် ထိုင်းနိုင်ငံဟာ လိင်တူချစ်သူတွေ လက်ထပ်ခွင့်ကို တရားဝင် အသိအမှတ်ပြုတဲ့ အရှေ့တောင်အာရှရဲ့ ပထမဆုံးနိုင်ငံနဲ့ အာရှရဲ့ တတိယမြောက်နိုင်ငံ ဖြစ်လာပါ တယ်။
တော်ဝင်ထောက်ခံချက်ကို စက်တင်ဘာ ၂၄ ရက်နှောင်းပိုင်းမှာ တရားဝင် တော်ဝင်ပြန်တမ်းနဲ့ ထုတ်ပြန်ခဲ့ပြီး အဓိပ္ပာယ်က ဥပဒေကြမ်းဟာ ရက်ပေါင်း ၁၂၀ ပြည့်မြောက်တဲ့ ၂၀၂၅ ခုနှစ် ဇန်နဝါရီ ၂၂ ရက်အတွင်း အသက် ဝင်လာမှာ ဖြစ်ပါတယ်။
တက်ကြွ လှုပ်ရှားသူတွေရဲ့ ဆယ်စုနှစ် နှစ်ခုကြာ ကြိုးပမ်းမှုရဲ့ အထွတ်အထိပ်ဖြစ်တဲ့ အဲဒီဥပဒေကို ဇွန်လမှာ အထက် လွှတ်တော်က အတည်ပြုခဲ့တာဖြစ်ပါတယ်။ အာရှရဲ့ ရေပန်းအစားဆုံး ခရီးသွားနေရာတစ်ခုဖြစ်တဲ့ ထိုင်းနိုင်ငံဟာ LGBT ယဉ်ကျေးမှုအပေါ် လက်သင့်ခံနိုင်မှုကြောင့် လူသိများပြီးသား ဖြစ်ပါတယ်။
