မူဆယ်တွင် ကျားဖြန့်လုပ်ကိုင်သူ ၅၄၉ ဦး ဖမ်းမိ
-----------------------
ရှမ်းပြည်နယ်(မြောက်ပိုင်း)၊ မူဆယ်မြို့၊ မင်္ဂလာမူဆယ်အိမ်ရာအနီးမှာ အွန်လိုင်းငွေလိမ် ကျားဖြန့်လုပ်ငန်းလုပ် ကိုင်သူ တရုတ်နိုင်ငံသား ၁၉၄ ယောက်နဲ့ မြန်မာနိုင်ငံသား ၃၅၅ ယောက် စုစုပေါင်း ၅၄၉ ယောက်ကို လက်နက်၊ ငွေကြေး၊ သက်သေခံပစ္စည်းတွေနဲ့အတူ ဖမ်းဆီးရမိခဲ့တယ်လို့ နစက သတင်းထုတ်ပြန်ရေး အဖွဲ့ခေါင်းဆောင် ဗိုလ်ချုပ် ဇော်မင်းထွန်းက ပြောပါတယ်။
ကျားဖြန့်လုပ်ငန်းတွေ လုပ်ဆောင်နေတယ်ဆိုတဲ့ သတင်းအရ မူဆယ်မြို့ က နေရာတွေကို တပ်မ တော်၊ ရဲတပ်ဖွဲ့နဲ့ အုပ်ချုပ်ရေးအဖွဲ့ စတဲ့ ပူးပေါင်းအဖွဲ့က စက်တင်ဘာ ၂၃ ရက်နဲ့ ၂၄ ရက်တွေမှာ ဝင်ရောက်ဖမ်းဆီးစစ်ဆေးမှုတွေ ဆောင်ရွက်ခဲ့တာလို့ ဆိုပါတယ်။
ဖမ်းဆီးရမိခဲ့တဲ့ တရုတ်နိုင်ငံသားတွေကို လူဝင်မှုကြီးကြပ်ရေး ဥပဒေနဲ့အညီ တရုတ်နိုင်ငံကို ပြန်လည်လွှဲပြောင်းမှု ဆောင်ရွက်သွားမှာဖြစ်ပြီး ကျန်သူတွေကတော့ တရားဥပဒေအရ အရေးယူဆောင်ရွက်မှုတွေကို ဆက်လက် ဆောင်ရွက်သွားမှာဖြစ်တယ်လို့ ဗိုလ်ချုပ် ဇော်မင်းထွန်းက ပြောပါတယ်။
လောင်းကစားလုပ်ရာမှာ အသုံးပြုတဲ့ ဖုန်း ၅၈ လုံး အပါအဝင် ဆက်စပ်ပစ္စည်းတချို့နဲ့ ယွမ် ၇ သိန်းကျော်ကိုလည်း သိမ်းဆည်းရမိခဲ့တယ်လို့ ဆိုပါတယ်။ မြန်မာနဲ့တရုတ် နှစ်နိုင်ငံအနေနဲ့ နယ်စပ်ဒေသ တည်ငြိမ်ရေး၊ တရားဥပဒေ စိုးမိုးရေးနဲ့ လုံခြုံရေးလုပ်ငန်းတွေကို ဆက်လက် ဆောင်ရွက်နေတယ်လို့လည်း ဗိုလ်ချုပ် ဇော်မင်းထွန်းက ပြောပါ တယ်။
