ပြောချင်တာ အဲဒါ

“ပရဟိတ” ဆိုတဲ့ စကားနဲ့ ပတ်သက်ပြီး ကျွန်တော် နားလည်ထားတာ တခု ပြောပြချင်တယ်။
ကျွန်တော် နားလည်တာကတော့ လူတယောက်ယောက်ဟာ ပရဟိတ လုပ်ငန်းကို အချိန်ပြည့် Full time လုပ်နေပြီ ဆိုရင် အဲဒါ Business ပဲ။
လူတယောက်က သူ့ စားဝတ်နေရေး အတွက် တခြား ဘာဆို ဘာအလုပ်မှကို မလုပ်နေဘဲ ပရဟိတ လုပ်ငန်းကိုပဲ အချိန်ပြည့် လုပ်နေရပါပြီ ဆိုရင် သူ့နေ့စဉ် စားသောက်သွားလာ နေထိုင်စရိတ်တွေက ဘယ်ကနေ ရမှာတဲ့လဲ။
***
ဒီတော့ သူကလည်း တခြား ဘာအလုပ်မှ မလုပ်နိုင်တော့အောင်ကို ဒီပရဟိတ လုပ်ငန်းမှာပဲ အချိန်တွေ ပေးနေရပြီ ဆိုရင် သူ ထမင်းစားဖို့ ငွေကလည်း အဲဒီအထဲကပဲ ယူသုံး ယူစားရမှာပဲ။
ဒါက ဘယ်သူ့ကိုမှ ပုတ်ခတ်နေတာ မဟုတ်ဘူးနော်။
ဘဏ်ထဲမှာ တသက်စာ သုံးမကုန်အောင်၊ လူက ဘာမှ လုပ်နေစရာ မလိုဘဲ အားအားယားယားနဲ့ ငွေတွေ ဝင်နေနိုင်တဲ့ လုပ်ငန်းကြီးတွေ ပိုင်ထားသူက ပရဟိတ လုပ်ငန်း အချိန်ပြည့် လုပ်နေတာ ဆိုရင်တော့လည်း တမျိုးပေါ့လေ…။
***
ဒီတော့ (အချိန်ပြည့်) ပရဟိတ ဆိုတာတွေဟာ လုပ်ငန်းလည်ပတ်ခြင်းတွေ၊ Business တွေ လို့ပဲ ကျွန်တော် နားလည်ထားတယ်။
အဲဒီ လုပ်ငန်းကို ဦးစီးနေသူ အပေါ် ကိုယ်က ဘယ်လောက်အထိ ယုံကြည်ပေးနိုင်မလဲ၊ ကိုယ်ပေးပို့ လှူဒါန်းတဲ့ ငွေထဲကနေ သူ ဘယ်လောက် သူ့အတွက် သုံးမှာကို ကြည်ဖြူနိုင်မလဲ ဆိုတဲ့ စိတ်အခြေခံနဲ့ လှူနိုင်ရင် လှူ..။ မလှူနိုင်ရင် မလှူနဲ့… ဒါပဲ။
ဒီလိုပဲ တွေးတယ်။
***
ဒါကြောင့်…။
တိုင်းပြည်မှာ တခုခု ဘေးအန္တရာယ် ကြုံတွေ့လာရလို့ အပေါ်က ပြောခဲ့တဲ့ ပရဟိတ business တွေ အလုပ်များနေတာကို ကျွန်တော်ကတော့ သူ့ business နဲ့သူ အလုပ်များချိန် ကျလာတယ်၊ ဒီလုပ်ငန်းရှင်က ဒီအလုပ် လုပ်ဖို့ ဒီအဖွဲ့ တည်ထောင်ထားလို့ အဲဒီ အလုပ်တွေ လုပ်နေတယ်လို့ပဲ မှတ်တယ်။
အဲဒါ သာမန် ဖြစ်စဉ်ပဲ။
ပရဟိတ အချိန်ပြည့် လုပ်နေသူကြီး ဆိုပြီး ကားကောင်းတွေ စီးပြ၊ လက်ဝတ်ရတနာတွေ ထည်လဲ ဝတ်ပြ၊ အရမ်းတွေ တောက်ပ လင်းလက်နေပြီ ဆိုရင်တော့ ဒီလူဟာ သူ့ Business ကနေ သူ့အတွက် အမြတ်ယူနေတာတွေ သိပ်များနေပြီ လို့ တွက်ရမယ်။
ဒါက ရိုးရိုးလေးပဲ။
လုပ်ငန်းရှင်နဲ့ လုပ်ငန်း လည်ပတ်မှုတွေ…ပေါ့။
***
ဘာမှ မဟုတ်ပါဘူးလေ။
ပရဟိတ မင်းသားကြီး တို့၊ ပရဟိတ မင်းသမီးကြီးတို့ ဒုတိယ မိခင် တတိယ ဖခင်တွေ ဆိုတဲ့ အသုံးအနှုန်းတွေနဲ့ တချို့ အရမ်းတွေ မြှောက်ပင့်ပေး နေတာ မျက်စိနောက်လာလို့ စိတ်ထဲ ရှိတာ ကောက်ရေးတာ…။
***
ကလိုစေးထူး