တောင်ငူ ရေဘေးမှာ ကယ်ဆယ်ရေးသမားတွေ ဘာကြောင့် အသက်ဆုံးရှုံးခဲ့ရသလဲ
အခုကြုံတွေ့နေရတဲ့ ရေဘေးနဲ့ မြေပြိုတာတွေကြောင့် ရေကြီးနစ်မြုပ်လို့၊ မြေပိလို့ သေဆုံးသူတွေထဲမှာ သဘာဝဘေးအန္တရာယ်ကြားရောက်နေတဲ့လူတွေရဲ့အသက်တွေကို ကယ်တင်ဖို့ကြိုးစားရင်း ကိုယ်တိုင်အသက်ပေးလိုက်ရတဲ့ စေတနာ့ဝန်ထမ်း ပရဟိတသမားတွေလည်းရှိလာပါတယ်။
စစ်တောင်းမြစ် အရှေ့ဘက်ခြမ်း ရေကြီးတဲ့အထဲမှာပါနေတဲ့ တောင်ငူမြို့မှာဆိုရင် ရေဘေးကယ်ဆယ်ရင်း ထွန်စက်ပေါ်ကနေ ပြုတ်ကျသေဆုံးတာ၊ ယာဥ်တိုက်မှုဖြစ်တာနဲ့ ရေစီးထဲမျောပါသေဆုံးသွားတာတွေကြောင့် သီတင်းတစ်ပတ်အတွင်း သေဆုံးတဲ့ ပရဟိတဝန်ထမ်း သုံးယောက်အထိ ရှိလာပါတယ်။
သေဆုံးခဲ့သူတွေထဲက တစ်ယောက်ဟာ ခရစ်ယာန်အသင်းတော်တစ်ခုက အသက် ၂၆ နှစ်အရွယ် ပရဟိတစေတနာ့ ဝန်ထမ်းလူငယ်ဖြစ်ပါတယ်။
ရေ စတက်တဲ့ရက်တွေမှာတော့ ကူညီကယ်ဆယ်ရေးလုပ်သူတွေမှာ သက်ကယ်အင်္ကျီတွေ လုံလုံလောက်လောက် မရှိကြပါဘူး။
“အသက်ကယ် အင်္ကျီမလုံလောက်တော့ ကလေးတစ်ယောက်ကို ပေးဝတ်ပြီး ကားပေါ်တက်လိုက်တဲ့အချိန် ရေစီးက ရိုက်တော့ ပြုတ်ကျပြီး ရေစီးနဲ့ပါသွားတာ၊ ဓာတ်တိုင်ပလက်ဖောင်းနဲ့ တိုက်မိပြီး မေးပြုတ်သွားတယ်” လို့ တောင်ငူအရေးပေါ်ကယ်ဆယ်ရေး ပရဟိတအဖွဲ့ တာဝန်ရှိသူတစ်ယောက်က ပြောပါတယ်။
စက်တင်ဘာလ ၁၅ ရက်၊ မနက်ခင်း ၁၀ နာရီခန့်မှာ ရေနဲ့မျောပါသွားတဲ့အဲဒီလူငယ်ရဲ့ ရုပ်အလောင်းကို အိမ်တွေကြားကနေ ပြန်ယူနိုင်ခဲ့ပြီး စက်တင်ဘာ ၁၇ ရက်မှာ သင်္ဂြိုဟ်ခဲ့ပါတယ်။
“သူကစိတ်ရင်းကောင်းတယ်၊ သူများကို ကူညီရတာကို ပျော်တယ်။ ရေဘေးစဖြစ်ကတည်းက ဘုရားကျောင်းဝန်းထဲမှာအိပ်ပြီး တောက်လျှောက် တနေကုန် လိုက်ကူညီတယ်။ အိမ်မပြန်တာမဟုတ်ဘူး၊ သူ့အိမ်ပါ ရေမြုပ်တဲ့အထဲပါတော့ သူ့မိသားစုကို ကယ်ထုတ်ပြီး သူက ရေဘေးမှာ ကူညီပေးနေတာပေါ့” လို့ သေဆုံးသွားတဲ့ ပရဟိတလူငယ်အကြောင်းကို အသင်းတော်ဘုန်းတော်ကြီးက မိန့်ပါတယ်။
ရေဘေးကူညီရင်း ယာဥ်မတော်တဆမှုကြောင့် သေဆုံးသူ နောက်တစ်ဦးကိုလည်း သင်္ဂြိုဟ်ပေးခဲ့ပြီးပြီဖြစ်ပေမဲ့ ခါးမှာကြိုးချည်ပြီး ကလေးတွေကို ကယ်ဆယ်ဖို့ အရှိန်နဲ့စီးနေတဲ့ရေထဲကို ဖြတ်ကူးခဲ့သူ တစ်ယောက်ကတော့ အခုထိပျောက်ဆုံးနေတုန်းပဲလို့ ဒေသခံတွေဆီကနေ သိရပါတယ်။
BBC
