ရူးပတ်မားဒေ့ါဖ်၏ အမွေဆက်ခံခွင့်အမှု အမေရိကန်တွင်စတင်
---------------------
မီဒီယာသူဌေးကြီး ရူးပတ်မားဒေ့ါဖ်ရဲ့ မီဒီယာအင်ပါယာနဲ့ မိသားစုအမွေ ပေါင်ငွေ (၁၄)ဘီလီယံ ပိုင်ဆိုင်မှုကို ဘယ်သူက ဆက်ခံခွင့်ရမလဲဆိုတာ ဆုံးဖြတ်မဲ့ တရားခွင်ဟာ အမေရိကန်နိုင်ငံမှာ တနင်္လာနေ့က အစပြုခဲ့ပါ တယ်။
အဲဒီအမှုမှာ အသက် (၉၃)နှစ်အရွယ် မားဒေါ့ဖ်နဲ့ သူရဲ့ သားသမီးတွေထဲက အကြီးပိုင်း (၃)ယောက်တို့ဟာ ဖခင် မားဒေါဖ်သေရင် ဘယ်သူက ပြောရေးဆိုခွင့် မဲအများစုနဲ့ News corp ၊ Fox News သတင်းဌာနတွေကို ထိန်းချုပ်ခွင့် ရရှိမလဲဆိုတာနဲ့ ပတ်သက်ပြီး တရားရင်ဆိုင်ကြမှာပါ။ မားဒေါ့(ဖ်)ဟာ သားအကြီးဆုံးဖြစ်သူ လော့(ခ်)လန် အနေနဲ့ ကျန်တဲ့ မောင်နှမသားချင်းတွေရဲ့ ကြားဝင်စွက်ဖက်မှု မရှိဘဲ မိသားစုပိုင်အမွေတွေကို ထိန်းချုပ်ခွင့်ရဖို့အတွက် ရှိနှင့်ပြီး မိသားစုပိုင်အမွေပစ္စည်းဆက်ခံရေး သဘောတူညီချက်ကို ပြင်ဆင်မှုလုပ်နေ ချင်ခဲ့တယ်လို့ သတင်းတွေ ထွက်ပေါ်နေခဲ့ပါတယ်။
ငါးကြိမ်တိတိ အိမ်ထောင်ပြုခဲ့သူ မားဒေ့ါ(ဖ်)မှာ နောက်ထပ် ဂရေ့စ်နဲ့ ကလွေး လို့ခေါ်တဲ့ ကလေးတွေလည်း ရှိပြီး အဲဒီကလေးနှစ်ယောက်ကတော့ အမွေဆက်ခံခွင့် သဘော တူညီချက်အရ အမွေပိုင်ဆိုင်မှုတွေမှာ ပြောရေးဆိုခွင့် မရကြသူတွေပါ။ အခု မားဒေါ့ဖ် ပြင်ဆင်ပြောင်းလဲချင်တဲ့ အမွေဆက်ခံခွင့် သဘောတူညီချက်ဟာ ပရူးဒန့်စ် ၊ ဂျိမ်းစ် နဲ့ အယ်လိဇဘက်တို့ကို အဲဒီ ကလေးနှစ်ယောက်နဲ့ တစ်တန်းတည်းထားဖို့ အားထုတ်မှုဖြစ်တယ်လို့ သိထားရကြောင်း မားဒေ့ါဖ်နဲ့ နီးစပ်သူတွေက ပြောပါတယ်။ ဒီအတွက် မားဒေါ့ဖ်ရဲ့ မီဒီယာလုပ်ငန်းတွေနဲ့ အမွေဆက်ခံရေးကိစ္စတွေမှာ သားကြီးဖြစ်သူ လော့(ခ်)လန်ကိုပဲ အာဏာအားလုံး လွှဲပြောင်း အပ်နှံသွားဖွယ်ရှိနေကြောင်းလည်း သုံးသပ်မှုတွေ ထွက်ပေါ်နေပါတယ်။
