ကလေးငယ် ၁၅၀ ကျော် မွေးစားခဲ့ပြီးဖြစ်ပေမဲ့ နောက်ထပ်မွေးစားဦးမယ်ဆိုတဲ့ အသက် ၈၀ ကျော် ဇနီးမောင်နှံ
ရောဘတ်နဲ့ မာဂရက်တို့ ဇနီးမောင်နှံဟာ အသက် ၈၀ ကျော်အရွယ် ရှိနေပြီး ကလေးငယ် ၁၅၀ ကျော်ကို မွေးစားခဲ့ပြီးဖြစ်ပေမဲ့ နောက်ထပ်ကလေးငယ်တွေ မွေးစားသွားဦးမှာဖြစ်တယ်လို့ ဆိုပါတယ်။ ဗြိတိန်နိုင်ငံ လင်ကွန်းရှိုင်းယားကောင်တီမှာ နေထိုင်တဲ့ ရောဘတ်နဲ့ မာဂရက်တို့ဟာ ၁၉၇၈ ခုနှစ်က ၁၄ နှစ်အရွယ် မိန်းကလေးငယ်တစ်ဦးကို စတင်မွေးစားခဲ့တာဖြစ်ပြီး နောက်ပိုင်းမှာတော့ အဲဒီကလေးက သူ့မိဘအရင်းတွေဆီ ပြန်သွားခဲ့ပါတယ်။
အဲဒီနောက်မှာတော့ သူတို့ဟာ ကျောက်ကပ်အစားထိုး ခွဲစိတ်ကုသမှုလုပ်ရမယ့် ကလေးငယ်တစ်ဦး အပါအဝင် ကလေးငယ်ရာချီကို မွေးစားခဲ့ကြတာပါ။ အဲဒီအထဲမှာ မွေးရာပါ ဒေါင်းဆင်ဒရုန်းရှိပြီး နှလုံးရောဂါရှိတဲ့ မိန်းကလေးငယ် ကင်လည်း ပါဝင်ပါတယ်။ ဆရာဝန်တွေက ၉ လကျော်တဲ့အထိ အသက်ရှင်မှာ မဟုတ်ဘူးဆိုတဲ့ ကင်ကို သူတို့ဇနီးမောင်နှံက မွေးစားခဲ့ကြပြီး ကင်နဲံအတူ ကမ္ဘာတစ်ဝန်းကို ခရီးသွားခဲ့ကြပါတယ်။ ကင်က အသက် ၂၁ နှစ်အထိ နေခဲ့ရပြီး ၂၀၀၅ ခုနှစ်မှာ ကွယ်လွန်ခဲ့တာပါ။
ကလေးငယ်တွေကို မွေးစားပြီး ပြုစုစောင့်ရှောက်ပေးနေတဲ့ သူတို့ဇနီးမောင်နှံကို လင်ကွန်းရှိုင်းယားကောင်တီက ဂုဏ်ပြုဆုချီးမြှင့်ခဲ့ပါတယ်။ ရောဘတ်နဲ့ မာဂရက်တို့ ဇနီးမောင်နှံက သူတို့မှာ ရင်သွေးမရှိလို့ ကလေးငယ်တွေကို မွေးစားတာ မဟုတ်ပါဘူး။ သူတို့မှာလည်း ရင်သွေးနှစ်ဦး ရှိပါတယ်။ ကျန်းမာရေးကောင်းနေသရွေ့ စောင့်ရှောက်ပေးဖို့ လိုအပ်တဲ့ ကလေးငယ်တွေကို မွေးစားသွားမယ်လို့ သူတို့က ဆိုပါတယ်။
