" အစားထိုးဖို့ ခက်တဲ့သူ "
▪️ငယ်ငယ်က စွဲစွဲလန်းလန်းဖတ်ခဲ့ရတဲ့ ဆရာမဂျူးရဲ့ဝတ္ထုလေးတစ်အုပ် ရှိပါတယ်။ "မရှိမဖြစ် မိုး"တဲ့ ။ အဲဒီစာအုပ်လေးထဲမှာ ဇာတ်ကောင်က မခင်မိုးမြင့်။ သူ့ရဲ့လုပ်ငန်းနယ်ပယ်မှာ သူ့ရဲ့ကျွမ်းကျင်မှုကိုလည်း အမြဲဂုဏ်ယူနေတဲ့သူ။ Essential ဖြစ်ချင်တဲ့သူ။ သူနေထိုင်ရှင်သန်ရာပတ်ဝန်းကျင်မှာ"မရှိမဖြစ်မိုး"ဆိုတာမျိုး ဖြစ်ချင်တဲ့သူပေါ့။
" မိန်းမဖြစ်စေ..ယောင်္ကျားဖြစ်စေ ကိုယ့်ပတ်ဝန်းကျင်မှာ ကိုယ်ဟာ အလိုအပ်ဆုံးလူသားဖြစ်အောင် ကြိုးစားခွင့်တော့ ရှိတယ်လေ..။ ကျွန်မဝန်းကျင်မှာ ကျွန်မဟာ မရှိရင်မဖြစ်လောက်အောင် လိုအပ်နေဖို့ ကြိုးစားခဲ့တာပဲ။ ကျွန်မသတ်မှတ်ထားတဲ့ လူ့တန်ဖိုးဆိုတာ အဲဒါပဲ.." တဲ့ ။ အဲဒီဇာတ်လမ်းထဲက မခင်မိုးမြင့်ပြောတဲ့ မှတ်သားစရာလေးပါပဲ။
▪️အဲဒါအမှန်ပဲနော်..။ လူရယ်လို့ဖြစ်လာဆိုရင် ယောက်ျားလေးပဲဖြစ်ဖြစ်၊ မိန်းကလေးပဲဖြစ်ဖြစ်ပါ၊ ကိုယ့်တန်ဖိုးဆိုတာ ကိုယ်တိုင်ပဲ တည်ဆောက်ရမှာ။ ကိုယ့်ရဲ့ဘဝကို တာဝန်ယူမှု တာဝန်ခံမှုရှိရမှာ။ အရွယ်ရောက်လာပြီဆိုရင် ကိုယ့်ဘဝက မတိုးတက်ရတာ ဘယ်သူ့ကြောင့်၊ ဘယ်ဝှာ့ကြောင့် ဆိုပြီးတော့ အပြစ်တင်နေလို့မရဘူး၊ လွှဲချနေလို့မရဘူး။
ကိုယ့်ဘဝကိုယ် တာဝန်ယူမှု၊ တာဝန်ခံမှုအပြည့်နဲ့ အကောင်းဆုံးဖြစ်အောင်တည်ဆောက်နေမှုဆိုတာ လူတစ်ယောက်ရဲ့တန်ဖိုး (Value) တစ်ခုပဲ။
စဉ်းစားကြည့်ပါ။ ကိုယ့်ဘဝကို ကိုယ့်တာဝန်မှ ကိုယ်မယူရင် ဘယ်သူက ယူပေးမှာလဲ..။ ကိုယ်မှ ပျင်းနေရင် ဘယ်သူက လာတည်ဆောက်ပေးမှာလဲ..။ ဘယ်သူ့မှာမှ တာဝန်မရှိဘူးနော်။ ကိုယ့်တာဝန် ကိုယ်ပဲရှိတာ။ ဒီတော့ ကိုယ့်ဘဝကို တာဝန်ယူမှုအပြည့်နဲ့ တည်ဆောက်တဲ့နေရာမှာ အရေးကြီးတဲ့အချက်လေးတွေကို သေချာလေး သိထားစေချင်တယ်။
💟၁။ အစားထိုးဖို့ ခက်တဲ့သူ ဖြစ်ပါစေ
သာမန်လောက်နဲ့ မကျေနပ်ပါနဲ့လို့ ပြောရင် "ဒါက လောဘကြီးရာ ရောက်တယ်၊ အပူတွေ များတယ်" လို့ ထင်နေကြတာ များတယ်။ အဲဒီလိုတွေ ထင်နေရင် ဘယ်နေရာမှာမှ ဖြစ်ဖြစ်မြောက်မြောက် ရှေ့ရောက်လာမှာ မဟုတ်ဘူး။ သာမန်ဆိုတာမျိုး မရှိစေချင်ဘူး။ လုပ်မယ့်လုပ် အကောင်းဆုံးလုပ်မယ်ဆိုတဲ့ စိတ်မျိုးပဲ ထားသင့်တယ်။
▪️တကယ့်လက်တွေ့မှာလည်း သာမန်ကာလျှံကာဆိုတဲ့လူတွေအတွက် နေရာမရှိဘူး။ အမျိုးသမီးတွေဆို ပိုဆိုးပါတယ်။ တစ်ချို့နေရာတွေမှာဆို အမျိုးသမီးတွေကို ရာထူးအမြင့်ပိုင်းတွေမှာ နေရာမပေးချင်ကြတာ များပါတယ်။ အဲဒီလိုနေရာတွေမှာဆို ကိုယ်က သာမန်အရည်အချင်းလောက်နဲ့ တိုးလို့ မရနိုင်ပါဘူး။ ကိုယ့်နေရာမှာ ကိုယ်မရှိရင် အဆင်မပြေနိုင်လောက်ပါဘူးဆိုတဲ့အထိ အစားထိုးဖို့ ခက်တဲ့သူတစ်ယောက် ဖြစ်လာပါစေ။
ဥပမာ.. ကိုယ်က Social မကောင်းဘူး။ စကားနည်းတယ် ဆိုပါစို့။ ကိုယ့်ရဲ့စကားနည်းမှု၊ မဖော်ရွေမှုကို လူတွေက သဘောမကျဖြစ်နိုင်တယ်။ ဒါပေမယ့် ကိုယ်က ကိုယ့်ရဲ့ Professional၊ ကိုယ်ရဲ့နယ်ပယ်မှာ တစ်ဖက်ကမ်းခတ်ကျွမ်းကျင်နေမယ်၊ အစားထိုးဖို့ခက်နေတဲ့သူဖြစ်နေမယ်ဆိုရင် ကိုယ့်ရဲ့အရည်အချင်းကို လျစ်လျှူရှုလို့ မရနိုင်ပါဘူး။ ဒါကြောင့် ကိုယ့်တန်ဖိုးကို အစားထိုးဖို့ ခက်လောက်အောင်သာ မြှင့်ထားကြည့်ပါ။
💟၂။ ကြိုးစားနေချိန်မှာ အထီးကျန်တယ်ဆိုတာ သဘာဝပဲ
ကြုံဖူးတဲ့သူတွေ နားလည်လိမ့်မယ်၊ ကိုယ်က တကယ့်ကိုအလုပ်ကို အသည်းအသန် ကြိုးစားနေရတဲ့အခါ ကျန်တဲ့နေရာတွေမှာ လစ်ဟင်းသလို ဖြစ်လာတယ်။ လူမှုရေးတွေ ပျက်ကွက်လာတာမျိုး ရှိလာနိုင်တယ်။ သူငယ်ချင်းတွေ ချိန်းတိုင်းလည်း မသွားနိုင်တော့ဘူး။ နောက်ပြီး တစ်ယောက်တည်းဖြစ်လာသလို ခံစားလာရလိမ့်မယ်။
▪️ကိုယ့်အနားမှာလည်း ဘယ်သူမှ မရှိသလို ခံစားရနိုင်သလို.. ကိုယ့်အနားကနေ ထွက်သွားကြတာတွေလည်း ကြုံလာရမှာပဲ။ အဲဒီလို ဖြစ်လာရင် စိတ်ဓာတ်မကျလိုက်ပါနဲ့..။ ဒါလေးက အချိန်တိုလေးပါပဲ။ ဒီအချိန်လေးတွေကို သည်းခံနိုင်တယ်ဆိုရင် ကိုယ်ဟာ စိတ်ဓာတ်ခိုင်မာမှုပိုင်းဆိုင်ရာ နောက်တစ်ဆင့်ကို တစ်လှမ်းနိုင်မှာ ဖြစ်ပါတယ်။
ကြိုးစားနေတဲ့ကာလဖြစ်တာမို့ ပင်ပန်းမယ်၊ အထီးကျန်သလိုခံစားရမယ်၊ တာဝန်ယူမှု တာဝန်ခံမှုမြင့်နေရမယ်၊ ဒါက သဘာဝပါပဲ။ အဲဒါကပဲ မိမိကို သန်မာတဲ့သူတစ်ယောက် ဖြစ်လာစေမှာပါ။
💟၃။ စိတ်ရောကိုယ်ပါ နှစ်မြှုပ်ပြီး လုပ်ကိုင်ပါ
နယ်ပယ်တခုမှာ ထိပ်ဆုံးကိုရောက်ဖို့၊ အကျွမ်းကျင်ဆုံးဖြစ်ဖို့ဆိုရင် မစတင်ခင်ကတည်းက ကိုယ်ဘာဖြစ်တာလဲ၊ ကိုယ်ဘာလိုချင်တာလဲ ရှင်းလင်းပြတ်သားစွာ သိထားဖို့လိုတယ်။
သူများက ဟိုဟာကောင်းတယ် ပြောလို့ လုပ်တယ်။ ဒါ ကောင်းတယ်ပြောလို့ လုပ်တယ်ဆိုတာမျိုးက ကိုယ့်ကိုယ်ကိုယ်ယုံကြည်မှု မရှိတဲ့သူတွေရဲ့စရိုက်လက္ခဏာမျိုးပဲ။ သုများပြောတိုင်း ကောင်းနိုးရာရာကို လုပ်နေမယ်ဆိုရင် ဘယ်နေရာမှ ဖြစ်ဖြစ်မြောက်မြောက်ရှိလာမှာ မဟုတ်ဘူး။ ပျောက်သောလမ်းမှာ စမ်းတဝါး ဖြစ်နေရမှာ။
▪️သူများက ဖြူတိုင်းလိုက်ဖြူ၊ သူများ မည်းတိုင်းလိုက်မည်း၊ သူများစကားနဲ့ လမ်းဆုံးမနေဘဲ ပညာရပ်တစ်ခုကို သင်ယူ၊ နယ်ပယ်တစ်ခုခုမှာ ကျွမ်းကျင်အောင် လေ့ကျင့်ထားပါ။ ရာနှုန်းပြည့် စိတ်ရောလူပါ နှစ်မြှုပ်ပြီး လုပ်ကိုင်ပါ။
ကိုယ့်ကိုယ်ကိုယ်တာဝန်ယူမှု တာဝန်ခံမှုအပြည့်ရှိပြီး နယ်ပယ်တစ်ခုမှာ Professional အဖြစ်၊ အစားထိုးဖို့ ခက်တဲ့သူတစ်ယောက်အဖြစ် ရပ်တည်နေသရွေ့ ကိုယ့်ရဲ့တန်ဖိုးကို နားလည်တဲ့ ရပ်ဝန်းတွေက ကိုယ့်ကို လိုအပ်နေမှာ အမှန်ပါပဲ။
#ဉာဏ
September 3, 2024
