အမှတ်တရသစ်ပင်
-------------------
လူသေလျှင် မြေမြှုပ်ကြသည်။ မီးရှို့ကြသည် အယူအဆအမျိုးမျိုးပင်။ မီးရှို့လျှင် ပြာဖြစ်သည်။ ပြာကို ရေထဲစွန့် သည်။ မြေထဲပစ်သည်။ ရေဩဇာ။ မြေဩဇာဖြစ်ရသည်။
မြေမြှုပ်လျှင်လည်း အခေါင်းထဲထည့်ကြသည်။ ဒီအတိုင်းလည်း မြှုပ်ကြသည်။ သေမှတော့ နောက်ဆုံးတွင် မြေကြီး ထဲတွင် ဘဝဆုံးကြရသည်။
လူတစ်ယောက်သေလျှင် ထာဝရလည်း အမှတ်ရနေစေရန်၊ အထိမ်းအမှတ်တစ်ခုအဖြစ် ကျန်နေခဲ့စေရန် စိတ်ကူးခဲ့သူ နှစ်ဦးရှိပါသည်။
ထိုသူနှစ်ဦးမှာ အီတလီနိုင်ငံမှ ဒီဇိုင်းနာများဖြစ်ကြသော Anna Citelli နှင့် Raoul Bretzel တို့ဖြစ်ကြသည်။
သူတို့က လူသေကို မြှုပ်ရန်အတွက် လူတွေလက်ခံထားကြသော အခေါင်းပုံစံမဟုတ်ဘဲ ဘဲဥပုံ ပန်းအိုးကို တီထွင်ကြသည်။ လူသေလျှင် သူတို့တီထွင်ထားသည့် Capsula Mundi ဟုခေါ်သော ပန်အိုးပုံစံထဲတွင် အလောင်းကို ထိုင်လျက်အနေအထားဖြင့် ထည့်သွင်းပြီး မြေမြှုပ်လိုက်ရန်ဖြစ်သည်။
အလောင်းအောက်၊ ဘေးပတ်လည်နှင့် အပေါ်တို့တွင် မြေသားတွေသာ ရှိနေမည်ဖြစ်ပြီး ထိုပန်းအိုးကိုလည်း မြေကြီးထဲတွင် အခေါင်းတွေမြှုပ်လိုက်သလို ထည့်ထားမည်ဖြစ်သည်။ ပန်းအိုးပေါ်ကို မြေသားတွေဖုံးပြီးလျှင် ထိုနေရာတွင် သစ်ပင် တစ်ပင်ကို စိုက်ပျိုးလိုက်မည်။ ကြိုက်သည့် အပင်ကို စိုက်နိုင်သည်။ ထိုအပင်က ပန်းအိုး အတွင်းရှိ အလောင်းနှင့် မြေဆီဩဇာများကို စုပ်ယူပြီး ကြီးထွားရှင်သန်နေစေမည်။
ထိုကြီးထွားလာမည့် အပင်သည် ပတ်ဝန်းကျင်ကိုလည်း အကျိုးပြု၊ ကျန်ရစ်ခဲ့သော မိသားစုအတွက်အလည်း အမှတ်တရဖြစ်နေစေမည့် သစ်ပင်တစ်ပင်ဖြစ်သည်။ သက်ရှိဇီဝ သံသရာကို အကျိုးရှိစွာဖြင့် နောက်ဆုံး ကွယ်လွန်သွားချိန်အထိ အကျိုးပြုသွားသည်ဆိုသော စိတ်ကူးကောင်းတစ်ခုဖြစ်သည်။
အီတလီမှ ဒီဇိုင်နာနှစ်ယောက်သည် သူတို့စိတ်ကူးကို တစ်ကမ္ဘာလုံးချပြီး အကြံပြုသည်။ မည်မျှ လိုက်နာပြီး လုပ်ဆောင်နေကြကြောင်းကိုမူ မသိရပေ။
(Ref: Extremely interesting facts)
တင်ညွန့်
၂၈.၈.၂၀၂၄