လူတချို့က ညနေစာလေး ချက်ဖို့ကို
အလုပ်ရှင်ဆီက လုပ်အားခ စောင့်တောင်းနေရတယ် ။
လူတချို့က အလုပ်သမားတွေကို ပြစ်ထားပြီး
ဘီယာဆိုင်မှာ ဘောလုံးပွဲကြည့်ရင်း
ကြက်ကြော်ကို အရသာမတွေ့လို့
ငြိုငြင်နေကြတယ် ။
လူတချို့က မနက်ဖြန်အတွက်တွေးရင်း
အိပ်မပျော်ပဲ ကြောင်အိမ်ဖွင့်ကြည့်ပြီး
ရေအိုးစင်က ရေကို လေးတွဲ့စွာ
သောက်နေကြတယ် ။
လူတချို့က အိပ်မရလို့ ဂိုဒေါင်ထဲက ကားကိုထုတ်
KTV မာဆတ် သွား ဇိမ်ခံရင်း
မနက်ဖြန်ကို မေ့နေကြတယ် ။
လူတချို့က စျေးတောင်းခေါင်းပေါ်ရွက်
လာအုံး ဆိုတဲ့ အသံ နားစွင့်ရင်း
ချွေးသုတ် နေကြတယ် ။
လူတချို့က သိန်းရာနဲ့ ထောင်နဲ့ချီတဲ့
ငွေကို ရဖို့ ဘဏ်သွားရမှာ နေပူသတဲ့ ...
လူတချို့က သားသမီးကို
ကျောင်းထမင်းချိုင့်ထဲ ဆီဆမ်း
ကြက်ဥကြော်လေး ထည့်ပေးပြီး
၅၀၀ တန် ဟောင်းနွမ်းတာလေး ပေးရင်း
မတည့်တာမစားနဲ့တဲ့ မှာနေတယ် ။
လူတချို့က သားသမီးတွေကျောင်းကို
ဇိမ်ခံ ကားနဲ့လိုက်ပို့
ကလေးက ... မေမေ သား ပုဇွန်ထုပ်မစားတော့ဘူးနော်
နေ့လည်ကျရင် ပီဇာ နဲ့ အချို့ရည်ပဲ ယူလာခဲ့နော်တဲ့
လူတချို့က ဒီလ အိမ်လခ မပေးနိုင်ရင်
နေစရာ မရှိတော့ပေမယ့်
လူတချို့က ၉ ထပ် RC ဆောက်မလို့
ပုံကြမ်းတွေ ထုတ်ခိုင်းနေတယ် ။
လူတချို့က အိပ်ယာထဲကနေ
ကြက်သားဆန်ပြုတ်လေးကို
ဆေးနီကြော် တစ်ထုပ်နဲ့ သောက်ချင်ပေမဲ့
စျေးကြီးနေလို့တဲ့ ။
လူတချို့က အထူးကု ဆေးရုံ ကို အားမရလို့
စင်္ကာပူသွား ဘန်ကောက်သွား
ချောင်းဆိုးပျောက်အောင် ကုမလို့တဲ့ ။
သေရင် ဘာမှ မပါပေမယ့်
မသေခင် ဘာမှ မရှိရင်
သေတာထက် ဆိုးတယ်ဆိုတာကို
မသိချင်ယောင် ဆောင်ပြီး
အားတင်း နေကြရပါတယ်
ကိုယ်ချင်းစာနာတတ်ကြပါစေ …။
Credit:::
MHK
