အဘွားအိုတစ်ဦးထဲ တိုက်ခန်းထဲ၌ရှိနေစဉ် အမျိုးသားနှစ်ဦးရောက်လာပြီး ထိုးကြိတ်လုယက်မှု တာမွေမြို့နယ်မှာ ဖြစ်ပွား
၂၀၂၄၊ သြဂုတ် ၁၉
ရန်ကုန်တိုင်းဒေသကြီး၊ တာမွေမြို့နယ်တွင် ယမန်နေ့ညပိုင်းက သက်ကြီးအဘွားအိုတစ်ဦးထဲ တိုက်ခန်းထဲ၌ရှိနေစဉ် အမျိုးသားနှစ်ဦးရောက်လာပြီး ထိုးကြိတ်လုယက်မှု ဖြစ်ပွားခဲ့ကြောင်း မြန်မာမွတ်စလင်မ် ပရဟိတအဖွဲ့ (MMRO) ထံမှ သိရသည်။
ဖြစ်စဉ်မှာ သြဂုတ် ၁၈ ရက်ညပိုင်းက တာမွေမြို့နယ်၊ တာမွေကြီး(ခ) ရပ်ကွက် ၁၆၆ လမ်းရှိ ၄ လွှာ တိုက်ခန်း၌ သက်ကြီးအဘွားအို ၁ ဦးထဲ ရှိနေစဉ် အမျိုးသား ၂ ဦးမှ အဘွားအား ထိုးကြိတ်၊ လည်ပင်းညှစ်၊ မျက်နှာအား ခေါင်းအုံးဖြင့်ဖိခြင်းများ ပြုလုပ်ပြီးနေစဉ် အဆိုပါတိုက် ၈ လွှာနေ သမီးဖြစ်သူမှ တံခါးဖွင့်မရသဖြင့် တိုက်ခန်းနေသူများ၏ အကူအညီဖြင့် တံခါးအားဖျက်၍ ဝင်ရောက်ခဲ့ရခြင်းဖြစ်ကြောင်း သိရသည်။
ထိုကဲ့သို့ တံခါးအားဖျက်၍ ဝင်ရောက်စဉ် လုယက်သူ ၂ ဦးမှာ ဘေးပြတင်းပေါက်မှ ခုန်ချထွက်ပြေးမှုကြောင့် ပတ်ဝန်းကျင်ပြည်သူများမှ လိုက်လံဖမ်းဆီးခဲ့ကြရာ လုယက်သူ ၁ ဦးကို ဖမ်းမိခဲ့ကြောင်း၊ ထို့နောက် သက်ဆိုင်ရာမှရောက်ရှိလာပြီး စစ်ဆေးဖမ်းဆီးခဲ့ခြင်းဖြစ်ကြောင်း မြန်မာမွတ်စလင်မ် ပရဟိတအဖွဲ့ (MMRO) ရဲ့ လူမှုကွန်ရက်တွင် ဖော်ပြထားသည်။
ထိုးကြိတ်လုယက်ခံလိုက်ရသည့် အဘွားအို လူနာအား ရန်ကုန်ဆေးရုံကြီး အရေးပေါ်ဌာနသို့ ကူညီပို့ဆောင်ပေးခဲ့ရကြောင်းလည်း ဖော်ပြထားသည်။
အဆိုပါဖြစ်စဉ်မှာ ထွက်ပြေးလွတ်မြောက်သွားသူ အမျိုးသားတစ်ဦးထံတွင် ရွှေထည်နဲ့ ငွေအချို့ ပါသွားကြောင်းလည်း သိရသည်။
ရန်ကုန်၊ ဇော်မင်း
Photo : မြန်မာမွတ်စလင်မ် ပရဟိတအဖွဲ့ (MMRO)
