ဝိန့်စိန်၊ အောင်သမာဓိ၊ ဇွဲထက်ရွှေဆိုင် ပိုင်ရှင်အပါအဝင် ၁၀ ယောက်ကိုတရားခံပြေး အဖြစ်သတ်မှတ်ပြီး တရားမဝင်ရွှေအရောင်းအဝယ်ပွဲစားအပါအဝင် ၂၁ ယောက်ကိုပါဖမ်းဆီး
ရွှေစျေးနူန်း မတည်ငြိမ်အောင် တရားမဝင်ရွှေအရောင်းအဝယ်ပြုလုပ်နေတဲ့ ပွဲစားအပါအဝင် ၂၁ ေယာက်ကိုဖမ်းဆီးထားတဲ့အပြင် အောင်သမာဓိရွှေဆိုင်၊ဝိန့်စိန်၊ဇွဲထက်ရွှေဆိုင်အပါအဝင် ၁၀ ယောက်ကိုပါ တရားခံပြေးအဖြစ်သတ်မှတ်ကာဖမ်းဆီးဖို့လုပ်ဆောင်နေတယ်လို့ နစကမှသတင်းထုတ်ပြန်လိုက်ပါတယ်။
တရားခံပြေးအဖြစ်သတ်မှတ်ခံရသူတွေက ဝိန့်စိန်ရွှေဆိုင် က ဦးအောင် ကောင်းမြတ်၊ အောင်သမာဓိရွှေဆိုင်ကဦးအောင်ဆန်းဝင်း၊ဇွဲထက်ရွှေဆိုင်ရဲ့ ဦးဆန်းဝင်း၊ခရမ်းသုံးခွရွှေဆိုင်ရဲ့ဦးသက်နောင် ဝင်း၊စိန်ကျော်မိုးရွှေဆိုင်ရဲ့ဦးကျော်ငြိမ်း၊အကယ်ဒမီရွှေသန့်ဇင်လုပ်ငန်းကဦးမျိုးသူဝင်း၊ရွှေဇင်ဝင်ရွှေသန့်စင်လုပ်ငန်းကဦးအေးကြူနဲ့ ပွဲစားတွေဖြစ်ကြတဲ့ ဦးကျော်ဝင်း၊ဦးညီညီဦး၊ဒေါ်တင်တင်နိုင်တို့ဖြစ်ပြီး လက်ရှိဖမ်းမိထားသူတွေရဲ့ ထွက်ဆိုချက်အရ ဖမ်းဆီးဖို့ဆောင်ရွက်နေတာဖြစ် တယ်လို့သိရပါတယ်။
အဆိုပါတရားခံပြေးအဖြစ်သတ်မှတ်ခံရသူ ၁၀ ယောက်ဟာ ပြည်တွင်းရွှေစျေးကွက်အတွင်းစျေးနူန်းမတည်မငြိမ်ဖြစ်အောင်နောက်ကွယ်ကနေ ဆောင်ရွက်နေသူတွေဖြစ်ကြောင်း ၊ စစ်ဆေးဖို့ခေါ်ယူဖို့ဆောင်ရွက်ခဲ့ပေမယ့် စစ်ဆေးမခံပဲထွက်ပြေးသွားတာဖြစ်တယ်လို့ နစကထုတ်ပြန်မှုအရသိရပါတယ်။
" ရွှေစျေး ကစားတဲ့သူတွေ ၊စျေးနူန်းမတည်ငြိမ်အောင်လုပ်သူတွေကို တာဝန်ရှိသူတွေက စုံစမ်းစစ်ဆေးအရေးယူမှုတွေလုပ်နေပါတယ်။ရှောင်တခင်ဝင်စစ်ပြီးအရေးယူမှုတွေဆက်တိုက်လုပ်နေပါတယ်၊ပြည်သူတွေဘက်ကလည်းတိုင်လို့ရပါတယ်။သတ်မှတ်စျေးထက်ပိုရောင်းတဲ့ရွှေဆိုင်တွေကိုတိုင်လို့ရတယ်၊အပြင်မှာဖြစ်နေတဲ့စျေးတွေကလေပတ်ကားစျေးတွေပါ " လို့ YGEA ရန်ကုန်တိုင်း ရွှေလုပ်ငန်းရှင်အသင်းဥက္ကဋ္ဌဦးမျိုးမြင့်ကပြောပါတယ်။
လက်ရှိ ဖမ်းဆီးရမိထားတဲ့ တရားမဝင်ရွှေအရောင်းအဝယ်လုပ်သူ ပွဲစားအပါအဝင် ၂၁ ယောက်ကို ဥပဒေနဲ့အညီထိရောက်စွာအရေးယူဖို့လုပ်နေတယ်လို့သိရပါတယ်။
ပြည်တွင်းရွှေဈေးကွက်အတွင်း အရောင်းအဝယ်တစ်ကယ်မဖြစ်တဲ့ လေပတ်ကား ရွှေဈေးနှုန်းကို လူမှုကွန်ရက်မီဒီယာကတဆင့် ဝါဒဖြန့်ချီပြီး ရွှေဈေးနှုန်းကိူ ဈေးကစားပြီး နိုင်ငံ့စီးပွားရေးမငြိမ်မသက်ဖြစ်အောင် ဆောင်ရွက်နေတာကြောင့် ဖမ်းဆီးခဲ့တာဖြစ်တယ်လို့သိရပါတယ်။
ရွှေဈေးနှုန်း အတက်အကျ ကြမ်းနေတဲ့ ကိစ္စနဲ့ပတ်သက်ပြီး မေ ၃၁ ရက်မှာ ရန်ကုန်နဲ့မန္တလေးက ရွှေလုပ်ငန်းရှင် အယောက် ၅၀ ဝန်းကျင် သက်ဆိုင်ရာ တာဝန်ရှိသူတွေက ခေါ်ယူစစ်ဆေး မေးမြန်းခံရကြောင်းသတင်းထွက်ပေါ်အပြီးမှာ ရွှေဆိုင်တွေနဲ့ပွဲစားတွေကို အရေးယူလိုက်ကြောင်း နစကဘက်မှသတင်းထုတ်ပြန်ခဲ့တာဖြစ်ပါတယ်။
ဒီနေ့ဇွန်လ ၂ ရက်နေ့မှာတော့ရွှေစျေးကပြန်လည်ကျဆင်းလာနေပြီး ၁၆ ပဲရည်အခေါက်ရွှေတကျပ်သားကို ၅၂၃၀၀၀၀ ကျပ်ရှိပြီး ၁၅ ပဲရည်ရေွှတကျပ်သားကိုလည်း ၅၀၃၀၀၀၀ ကျပ်အထိ ပြန်ကျခဲ့ပါတယ်။
ရွှေစျေးက မေလ ၂၉ ရက်နေ့တုန်းက ၁၆ ပဲရည်အခေါက်ရွှေတကျပ်သားကို ၅၈၂၀၀၀၀ ကျပ်အထိစံချိန်တင်မြင့်တက်ခဲ့ ပြီး ၁၅ ပဲရည်ရေွှတကျပ်သားကိုလည်း ၅၆၂၀၀၀၀ ကျပ်အထိအသီးသီး ဆက်တိုက် အတက်ကြမ်းခဲ့ပြီးနောက် လေးရက်အတွင်းမှာ ၁၆ပဲရည် အခေါက်ရွှေရော ၁၅ ပဲရည်ရွှေပါ တကျပ်သားကို ၅၉၀၀၀၀ ကျပ်နူန်းစီပြန်ကျခဲ့ပါတယ်။
