ဘိုင်ယန်မြူးနစ်ဟာ လမ်းစဉ်ဟောင်းကို ပြန်အသက်သွင်းတော့မှာလား
-----------------
ဘိုင်ယန်မြူးနစ်ဟာ လေဗာကူဆင်အသင်းရဲ့ကွင်းလယ်တိုက်စစ်ကစားသမား ဖလိုရီယန် ဝစ်ဇ် ကို ခေါ်ယူဖို့အတွက် စီစဉ်စရာရှိတာတွေကို စတင်စီစဉ်နေပြီလို့ သိရှိရပါတယ်။ ဖလိုရီယန် ဝစ်ဇ်အတွက် ဘိုင်ယန်မြူးနစ်ဘက်က ပြောင်းရွှေ့ကြေးပမာဏ ပေါင်သန်း ၁၀၀ လောက်အထိ သုံးစွဲဖို့ ပြင်ဆင်ထားပြီး သိပ်မကြာခင်မှာပဲ ဆွေးနွေးမှုတွေ အစပြုနိုင်ဖို့ ဘိုင်ယန်မြူးနစ်ဘက်က လိုလားနေပါတယ်။
ဘိုင်ယန်မြူးနစ်ဟာ ပြီးခဲ့တဲ့ဘောလုံးရာသီတုန်းက ဆုဖလားလက်မဲ့အဖြစ်နဲ့ ရာသီသိမ်းခဲ့ရတာကို ပြုပြင်ပြောင်းလဲနိုင်ဖို့အတွက် မျိုးဆက်သစ်ကစားသမားတချို့ကို ခေါ်ယူစုစည်းဖို့ ပြင်ဆင်နေပြီး ဖလိုရီယန် ဝစ်ဇ် ဟာ ဘိုင်ယန်မြူးနစ် ခေါ်ယူလိုနေတဲ့ ဦးစားပေးတွေထဲမှာ တစ်ယောက်အပါအဝင် ဖြစ်လို့နေပါတယ်။ ဒါပေမဲ့ ဘိုင်ယန်မြူးနစ်နည်းပြသစ်အဖြစ် ကွမ်ပနီကို ခန့်အပ်လိုက်တဲ့အချက်က ထိပ်တန်းကစားသမားတွေကို ဆွဲဆောင်နိုင်စွမ်း လျော့ကျသွားခဲ့ပြီး အသင်းမှာရှိနေတဲ့ ထိပ်တန်းကစားသမားတချို့ အသင်းပြောင်းမသွားစေဖို့အတွက်တောင် ဘိုင်ယန်မြူးနစ်က အားထုတ်ကြိုးစားနေရပါတယ်။
ဘိုင်ယန်မြူးနစ်ဟာ အတိတ်ကာလတုန်းကလည်း သူတို့ကို ရင်ဘောင်တန်းလာတဲ့ပြိုင်ဘက်တွေဆီကနေ အဲ့ဒီအသင်းအတွက် အရေးပါတဲ့ ကစားသမားတချို့ကို ဝယ်ယူကာ ပြိုင်ဘက်ရဲ့ဟန်ချက်ကို ယိမ်းယိုင်သွားစေခဲ့ဖူးပြီး အခုတစ်ကြိမ်မှာလည်း အဲ့ဒီလမ်းစဉ်ဟောင်းကိုပဲ ဘိုင်ယန်မြူးနစ်က ပြန်လျှောက်ဖို့ ပြင်ဆင်လာတာဖြစ်တယ်လို့ သုံးသပ်ချက်တွေလည်း ထွက်ပေါ်နေပါတယ်။ ဖလိုရီယန် ဝစ်ဇ် ဟာ ကွင်းလယ်တိုက်စစ်နေရာတစ်ခုတည်းသာမကဘဲ ဘယ်တောင်ပံမှာလည်း အကောင်းဆုံးခြေစွမ်းနဲ့ ကစားပြနေနိုင်သူဖြစ်ပါတယ်။
