ဒီတစ်ပတ်အတွင်းမှာပဲ အမ်ဘတ်ပေ ကို မိတ်ဆက်ပေးဖို့ စီစဉ်နေတဲ့ ရီးရဲလ်
------------------
ရီးရဲလ်မက်ဒရစ်အသင်း ဟာ ပြင်သစ်တိုက်စစ်မှူး အမ်ဘတ်ပေကို အသင်းရဲ့တရားဝင်ကစားသမားအဖြစ် ဇွန်လ ၂ ရက်နေ့ကနေ ဇွန်လ ၅ ရက်နေ့ကြားမှာ မိတ်ဆက်ပေးသွားဖို့ ရှိနေတယ်လို့ ဆိုပါတယ်။ ရီးရဲလ်မက်ဒရစ်ဟာ အမ်ဘတ်ပေ ကို သူတို့အသင်းကိုယ်စားပြု ကစားသမားအဖြစ်နဲ့ ယူရို ၂၀၂၄ ပြိုင်ပွဲကို ပါဝင်ကစားချင်စေပြီး အဲ့ဒါကြောင့်ပဲ ပြိုင်ပွဲမတိုင်ခင်မှာ မိတ်ဆက်ဖို့ စီစဉ်နေတာဖြစ်ကြောင်း သတင်းတွေ ထွက်ပေါ်နေပါတယ်။
အမ်ဘတ်ပေ ဟာ လာမယ့်ဇွန်လ ၃၀ ရက်နေ့ကိုရောက်မှ ပီအက်စ်ဂျီအသင်းနဲ့ စာချုပ်သက်တမ်း တရားဝင် ကုန်ဆုံးမှာဖြစ်ပေမယ့် ရီးရဲလ်မက်ဒရစ်ဘက်က သူ့ကို အချိန်စောစီးစွာ မိတ်ဆက်ခွင့်ရှိနေတာမို့ ဇွန်လ ၂ ရက်နဲ့ ဇွန်လ ၅ ရက်နေ့အကြားမှာ မိတ်ဆက်ပွဲကို စီစဉ်ဖို့ ရီးရဲလ်မက်ဒရစ်ဘက်က အားထုတ်လာတာပဲဖြစ်ပါတယ်။ အမ်ဘတ်ပေ ဟာ ရီးရဲလ်မက်ဒရစ်ဆီကို အလွတ်ပြောင်းရွှေ့ကြေးနဲ့ ပြောင်းလာခဲ့တာဖြစ်ပြီး ရီးရဲလ်မက်ရစ်ဘက်က သူ့ကို စာချုပ်လက်မှတ်ရေးထိုးကြေးနဲ့ လုပ်ခလစာအကျိုးခံစားခွင့်တွေကို စံချိန်တင်ပေးအပ်လိမ့်မယ်လို့ သိရှိရပါတယ်။
အမ်ဘတ်ပေ ကို ပီအက်စ်ဂျီဘက်က စာချုပ်သစ် ချုပ်ဆိုခဲ့ချင်သေးပေမယ့် ပြီးခဲ့တဲ့ဘောလုံးရာသီကတည်းက ရီးရဲလ်မက်ဒရစ်ဆီ သူ့ကို ရောင်းမထုတ်ပေးခဲ့လို့ စိတ်ကွက်နေခဲ့တဲ့ အမ်ဘတ်ပေ ဟာ ရီးရဲလ်မက်ဒရစ်ဆီကို အလွတ်ပြောင်းရွှေ့ကြေးနဲ့ပြောင်းရွှေ့ဖို့ ဆုံးဖြတ်ချက် ချမှတ်သွားခဲ့တာဖြစ်ပါတယ်။
