Update News- အခေါက်ရွှေတစ်ကျပ်သားလျှင် ၅၇ သိန်း ၅ သောင်းအထိ စျေးနှုန်းများ ထပ်မံမြင့်တက်ပြီး ရွှေအရောင်းမရှိတော့ဘဲ လုံး၀ ရပ်ဆိုင်းနေ
ရန်ကုန်၊ မေ ၂၉
ပြည်တွင်းရွှေစျေးကွက်တွင် အခေါက်ရွှေတစ်ကျပ်သားလျှင် ငွေကျပ် ၅၇ သိန်း ၅ သောင်းအထိ စျေးနှုန်းများ မြင့်တက်နေပြီး နာရီပိုင်းအတွင်း ရွှေစျေးမှာ ၁ သိန်းခွဲကျပ်နီးပါး ထိုးတက်သွားခြင်းဖြစ်ကြောင်း သိရှိရသည်။
"ရွှေစျေးကွက် အရောင်းမရှိတော့ဘူး။ ပစ္စည်းလည်း ထွက်မလာဘူး။ စျေးတွေ တအားအော်နေတာ။ ဒေါ်လာစျေးကလည်း တောက်လျှောက်အတက်ပဲ။ မိနစ်တိုင်း ပြောင်းလဲနေတယ်။ ဒီလောက်ကြီး အတက်ကြမ်းတာ ရွှေလောကဘက်မှာ ဒါက ပထမဦးဆုံးပဲ"ဟု ရန်ကုန်ရွှေကုန်သည်တစ်ဦးက ဆိုသည်။
ယနေ့ နံနက်ပိုင်းတွင် စျေးကွက်စတင်ဖွင့်ချိန်က အခေါက်ရွှေစျေးမှာ ၅၅ သိန်း ၃ သောင်း၊ ယင်းနောက် ၅၅ သိန်း ၇ သောင်း၊ ထို့နောက် ၅၅ သိန်း ၉ သောင်း၊ မွန်းလွဲပိုင်းတွင် ၅၆ သိန်း၊ ယခု ညနေ ၃ နာရီ ၁၀ မိနစ်ဝန်းကျင်အချိန်တွင် ၅၇ သိန်း ၅ သောင်းစသည်ဖြင့် စျေးနှုန်းများ တရှိန်ထိုး မြင့်တက်လာခြင်းဖြစ်ကြောင်း သိရှိရသည်။
"အရင်စျေးတက်ရင် စံချိန်တင်စျေးဖြစ်ရင် ရွှေတွေထွက်လာတယ်။ထုတ်ရောင်းတယ်။ အခုက ပစ္စည်းထွက်မလာဘူး။ အဲဒါကတော့ အတော်ထူးခြားတယ်" ဟု ရန်ကုန်ရွှေကုန်သည်က ဆိုသည်။
