မန်ယူ အက်ဖ်အေဖလား ရသွားလို့
ချဲလ်ဆီး ပေါင် ၅ သန်း ထပ်ရမယ်
----------------
မန်ယူအသင်းက အက်ဖ်အေဖလားချန်ပီယံဖြစ်သွားတဲ့အတွက် ချဲလ်ဆီးအသင်းဟာ ပေါင် ၅ သန်း ရရှိပါတော့မယ်။ ဘာကြောင့်လဲဆိုတော့ မေဆန်မောင့်ကို ရောင်းချပေးတာမှာ ပါဝင်တဲ့ သဘောတူညီချက်ကြောင့်ပါပဲ။ မန်ယူဟာ ချဲလ်ဆီးဆီကနေပြီး မေဆန်မောင့်ကို ဝယ်ယူခဲ့စဉ်က အက်ဖ်အေဖလားချန်ပီယံဖြစ်ခဲ့ရင် မေဆန်မောင့်ကို ရောင်းချပေးမှုရဲ့အကျိုးဆက်အဖြစ် အပိုဆုကြေးအကျိုးခံစားခွင့် ပေါင် ၅ သန်းကို ချဲလ်ဆီးကို ပေးမယ်လို့ သဘောတူထားပါတယ်။
ဒါကြောင့်လည်း လက်ရှိမှာ မန်ယူက အက်ဖ်အေဖလားဆွတ်ခူးရရှိခဲ့ပြီဖြစ်လို့ ချယ်လ်ဆီးက ပေါင် ၅ သန်း ရရှိတော့မှာပါ။ မန်ယူဟာ မေဆန်မောင့်ကို အများကြီး မျှော်လင့်ထားခဲ့ပေမယ့် ဒီနှစ်ဘောလုံးရာသီမှာ သူက မန်ယူအတွက် အကောင်းဆုံး ပေးဆပ်ကစားတာမျိုး မလုပ်နိုင်ခဲ့ပါဘူး။
ဒဏ်ရာပြဿနာတွေ ရှိခဲ့တာကလည်း မေဆန်မောင့်အတွက် ထိုးနှက်ချက်ဖြစ်ခဲ့ပြီး ရှေ့လာမယ့်ဘောလုံးရာသီသစ်ကို ရောက်ရင်တော့ အခုထက် ပိုကောင်းတဲ့ စွမ်းဆောင်ရည်တွေကို မေဆန်မောင့်ဆီကနေ မြင်တွေ့ခွင့်ရနိုင်ဖို့ မန်ယူပရိသတ်တွေက မျှော်လင့်နေကြပါတယ်။
မေဆန်မောင့်ဟာ အခုမတိုင်ခင်က ဝင်ဘလေဘောလုံးကွင်းထဲကို လာရောက်ကာ သူကိုယ်စားပြုတဲ့အသင်းတွေနဲ့အတူ ဖိုင်နယ်ပွဲ ၆ ပွဲ ပါဝင်ကစားပေးခဲ့ပေမယ့် တစ်ပွဲမှ အနိုင်မရခဲ့ပါဘူး။ အခုတော့ မန်ယူဆီကို ပြောင်းလာခဲ့ပြီးတဲ့နောက် ဝင်ဘလေဆီ လာရောက်ကစားတဲ့ ဖိုင်နယ်ပွဲမှာ မေဆန်မောင့်က ဆုဖလား ဆွတ်ခူးလိုက်နိုင်ပြီဖြစ်ပြီး ဝင်ဘလေဆီက ၇ ပွဲမြောက် ဖိုင်နယ်ပွဲမှာ သူဝတ်ဆင်တဲ့ လပ်ကီးဆဲဗင်း ကျောနံပါတ်အတိုင်း မေဆန်မောင့်က ကံကောင်းမှုတွေကို ပိုင်ဆိုင်သွားခဲ့ပြီပဲဖြစ်ပါတယ်။
