သုံးမိနစ်မန်ယူ ဖြစ်တည်ခဲ့ခြင်းဟာ
၂၅ နှစ်ပြည့်မြောက်ခဲ့ပြီ
----------------------
၁၉၉၉ ခုနှစ်ရဲ့ အခုလိုနေ့မျိုးမှာပေါ့။ မန်ယူအသင်းဟာ ချန်ပီယံလိဂ်ဗိုလ်လုပွဲမှာ ဘိုင်ယန်မြူးနစ်အသင်းကို နောက်ကျမိနစ်သွင်းဂိုးတွေနဲ့ အနိုင်ယူပြီး အင်္ဂလန်ကလပ်အသင်းတွေထဲ ချန်ပီယံလိဂ်အပါအဝင် ဖလားသုံးလုံးအောင်မြင်မှုရယူနိုင်တဲ့ ပထမဆုံးအသင်းအဖြစ် မှတ်တမ်းရေးထိုးနိုင်ခဲ့ပါတယ်။
ချန်ပီယံလိဂ်ဗိုလ်လုပွဲမှာ မန်ယူအသင်းဟာ ဘိုင်ယန်မြူးနစ်ကို ပွဲအစ ၆ မိနစ်ကတည်းက ဘက်စ်လာရဲ့သွင်းဂိုးကြောင့် နောက်ကလိုက်ကစားခဲ့ရပြီး ၉၀+၁ မိနစ်နဲ့ ၉၀+၃ မိနစ်တို့မှာ ရှရင်ဂမ်၊ ဆိုးလ်ရှားတို့ရဲ့ သွင်းဂိုးတွေကြောင့် အနိုင်ရရှိခဲ့တာပါ။
အဲဒီနောက်ပိုင်းမှာတော့ မြန်မာပြည်ပရိသတ်တွေအကြားမှာ သုံးမိနစ်မန်ယူဆိုတာ ရေပန်းစားလာခဲ့ပြီး ပရိသတ်အင်အားလည်း အလုံးအရင်းနဲ့ များပြားလာခဲ့တယ်လို့ ဆိုကြပါတယ်။ အဆိုပါဘောလုံးရာသီမှာ မန်ယူအသင်းဟာ ပရီးမီးယားလိဂ်ပြိုင်ပွဲမှာ အာဆင်နယ်အသင်းကို တစ်မှတ်အသာနဲ့ ကျော်ဖြတ်ကာ ဗိုလ်စွဲခဲ့တာဖြစ်ပြီး အက်ဖ်အေဖလားဗိုလ်လုပွဲမှာတော့ နယူးကာဆယ်ကို ၂ ဂိုးပြတ်နဲ့ အနိုင်ရခဲ့တာဖြစ်ပါတယ်။
ဒီနေ့ဟာ မန်ယူပရိသတ်တွေအတွက်တော့ အမှတ်တရနေ့ရက်ဖြစ်ပြီး
သုံးမိနစ်မန်ယူဖြစ်တည်လာခဲ့ခြင်း
၂၅ နှစ်ပြည့်လို့လည်း ဆိုနိုင်ပါတယ်။
